:: INFÓRMATE dende a Galiza ::

Un portal para o movemento xuvenil galego

Archivado en Novas Quentiñas • Fecha: 07-02-2007 13:21

Com o objectivo de falar sobre estas propostas, convoca-se umha reuniom para o Domingo 11 de março às 17:00 na Casa Encantada de Compostela. Esta é umha reuniom aberta a todas as associaçons e pessoas que se consideram parte do movimento juvenil galego (em qualquera das suas vertentes: cultura, música, política, ecologismo, desporto, estudantil, feminismo, centros sociais, lezer...).

1. Objectivos da Proposta: Procuramos criar umha coordenaçom e comunicaçom mínimas entre o movimento juvenil galego, propiciadoras dumha unidade de facto naquelo que partilhemos, e superando as barreiras que imponhem as siglas.

2. Como? Quantas vezes umha opiniom, umha campanha, umha iniciativa... seria partilhada por nós se nom vinhesse de quem vem? Quantas vezes as siglas de quem assina tenhem servido para que rechacemos umha ideia cujo conteúdo, por sim próprio, assumiríamos sem dificuldade? E quantas vezes as "unidades de acçom" baseadas em plataformas e coordenadoras, ademais de viciadas polos debates de sempre, tenhem sido questionadas como ferramentas de tal ou qual grupo para levar o gato à agua? Frente a esto propomos potenciar o trabalho sem siglas, a comunicaçom directa, o intercámbio de reflexons, de ideias e de iniciativas entre as pessoas e os colectivos que configuramos esse movimento diverso, plural, rico e difuso da mocidade galega. Deixar à margem os continentes (as organizaçons e as suas siglas) para ficar com os conteúdos.

3. A proposta concreta:

Em realidade som duas.

1. A primeira é criarmos na internet um Portal do movimento juvenil galego, da mocidade que luitamos por transformar a Galiza. Este portal seria de publicaçom aberta (tipo indymedia) e contaria com duas secçons fundamentais.

A principal seria de "recursos", e nela poderiam ser subidas e baixadas todo tipo de iniciativas (campanhas, colantes, plantilhas, cartazes, convocatórias, panfletos...) com a única condiçom de nom irem assinadas por ninguém. A ideia é simples: se o grupo "A" de Compostela tem desenhada umha campanha contra o AVE, por exemplo, e conta com umha boa análise, um bom material de propaganda, propostas de actos interessantes...que passe das siglas e o ponha em internet a disposiçom de todo o mundo, para que assim (tomando-o directamente ou modificando-o à vontade) poda ser utilizado sem reticências nem problemas polo grupo "B" de Vigo e o grupo "C" de Dozom. Trata-se de ir superando o cpyright partidário, de apostar polo copyleft político, para o qual o primeiro é deixar-nos de "marcas". Prescindindo de siglas daremo-nos conta de que estamos mais perto do que pensávamos (porque igual "A" é independentista, "B" anarquista e "C" um grupo de mulheres sem organizaçom...), e conseguiremos que as nossas iniciativas podam chegar a mais lugares e pessoas.

A segunda secçom importante seria de "documentos", e seria mais ou menos como a anterior, só que no plano teórico. Informaçom, análises, textos de debate...poderiam ser partilhados entre o conjunto do movimento juvenil, constituindo-se tanto um fundo documental sobre os temas que nos preocupam (dados e informaçom sobre vivenda, consumismo, sexualidade, língua, drogas....), quanto um ponto de intercámbio de análises e reflexons (individuais ou colectivas, mas sempre sem assinar) sobre estes temas.

Nós propomos que só haja duas condiçons para a utilizaçom deste espaço na internet:

- A primeira seria que nada fosse assinado por organizaçom, grupo nem sigla nengumha. Nem que, no que aos recursos se refire, se suba material de umha organizaçom só que quitando-lhe o logo (vamos, que nom é plam de que o mesmo panfleto ou o mesmo cartaz que "A" está a distribuir assinado, seja colado sem o logótipo no Portal para que se distribua no resto do país...). Trata-se de aprendermos a funcionar deixando à margem o que nos separa e atendendo ao que nos une, tirando a um lado o "quem" e priorizando o "que".

- A segunda seria que fosse um portal monolíngue em galego e que portanto -com excepçom de documentaçom nom elaborada por nós (por exemplo um informe oficial com dados interessantes, artigos de opiniom elaborados por outros, dados recolhidos da imprensa...)- todo o que subamos esteja no nosso idioma. Achamos que este é de facto e deve ser um ponto de uniom do movimento juvenil galego, enquanto a utilizaçom do espanol seria um elemento fortemente ofensivo para a maioria de nós.

2. A segunda proposta é testarmos a possibilidade e o interesse de organizar encontros anuais do movimento juvenil, com um objectivo fundamentalmente formativo (conhecer as posiçons, experiências e iniciativas de outras associaçons, intercambiar análises, organizar palestras, achegar visons...), mas também de convívio e conhecimento entre a mocidade galega socialmente activa.

Com o objectivo de falar sobre estas propostas, convoca-se umha reuniom para o DOMINGO 11 DE MARÇO às 17:00 na CASA ENCANTADA DE COMPOSTELA. Esta é umha reuniom aberta a todas as associaçons e pessoas que se consideram parte do movimento juvenil galego (em qualquera das suas vertentes: cultura, música, política, ecologismo, desporto, estudantil, feminismo, centros sociais, lezer...). Assim e todo, por questons de operatividade, achamos que seria mais conveniente que as associaçons (ou grupos de activistas nom organizados) enviem umha representaçom.

Um saúdo e até entom!