:: INFÓRMATE dende a Galiza ::

Cinco países da UE opuxéronse a que se exceda o límite de 48 horas semanal

Archivado en Novas Quentiñas • Fecha: 08-11-2006 10:59

Os ministros de Emprego da UE non lograron desbloquear hoxe a reforma da normativa que regula a xornada laboral, xa que España, Francia, Italia, Grecia e Chipre opuxéronse a que se aumente o límite de 48 horas á semana.

Estes países opuxéronse a que se exceda esta limitación e formaron unha minoría suficiente para bloquear o intento de aumentalo, segundo informou a presidencia finlandesa da UE. A ministra finlandesa, Tarja Filatov, sinalou que a Comisión Europea debe decidir o próximo paso sobre a proposta de reforma, que leva discutíndose sen éxito durante máis de tres anos.

Pola súa banda, o ministro de Traballo, Jesús Caldera, reafirmouse á saída da reunión na posición que defendeu no Consello que "supón manter unha posición firme en apoio da Europa social". Caldera recordou ademais que é unha opinión que comparten a patronal e sindicatos españois, así como o conxunto das forzas políticas e das Comunidades Autónomas.

A Comisión estudará novas propostas de reforma

O comisario europeo de Emprego, Vladimir Spidla, explicou pola súa banda que a Comisión "examinará os resultados" da reunión de hoxe e analizará a posibilidade de suscitar outras propostas de reforma da Directiva, en vista dos fracasos dos últimos anos para chegar a un acordo.

Ademais, anunciou que nas próximas semanas a Comisión iniciará procedementos de infracción contra os 23 países que incumpren a actual normativa, fundamentalmente por non recoñecer como tempo de traballo os períodos inactivos das gardas. Respecto de este punto, Caldera asegurou que aínda que a Comisión di que pode haber incumprimentos nalgún sector en España, o país "non ten ningún problema" con esa Directiva e que se o houbese "resolveríase".

Finlandia convocou o Consello extraordinario de hoxe para intentar chegar a un acordo sobre a Directiva de Tempo de Traballo, que durante máis de tres anos leva discutíndose a nivel europeo sen éxito. O principal escollo da reforma da actual lexislación, de 1993, é a chamada cláusula do "opt out", introducida con carácter excepcional e que permite superar as 48 horas laborais por acordo entre o empresario e o traballador.

Fontes:
España y otros cuatro países bloquean el aumento de la jornada laboral
España y otros cuatro países bloquean el aumento de la jornada laboral

Preocúpanme varias cousas:

A tendencia á dereita e ao capitalismo salvaxe dos países do norte de Europa, que ata o momento eran garantía de certas garantías sociais (países nórdicos, Alemaña, Holanda, ...)

O feito de que algo de vital importancia coma cambiarnos a xornada laboral non necesite un referendum para aprobarse, se oculte a decisión ata que está tomada, e unha vez se chega a unha conclusión tan só sae a noticia pola porta de atrás en periódicos económicos e sección económica de xornais xerais (e logo aparecen cousas como que morreu F.Fdez.Ochoa na portada, claro isto afecta moito máis á miña vida é evidente).

Que en Europa nos din unha cousa e fan outra, ¿ata cando tanta demagoxia?

Publicado por Birnarem
190 lecturas • 0 Comentarios • 106 Referencias